Өрөспүүбүлүкэтээҕи доруобуйа харыстабылын тэрилтэлэригэр коронавируһу утары үлэҕэ колл-кииннэргэ, балыыһаларга уонна лабораторияларга Дьокуускайдааҕы медицина коллеһын 300-тэн тахса устудьуона көмөлөһүө. Бу туһунан СӨ үөрэҕин уонна наукатын министиэристибэтин пресс-сулууспата иһитиннэрэр.
Колледж дириэктэрин солбуйааччыта Анастасия Степанова иһитиннэрбитинэн, устудьуоннары волонтер быһыытынан медицина бары тэрилтэлэригэр сыһыардылар: поликлиникаларга, балыыһаларга, оройуон киин балыыһаларыгар. Ол курдук, быраас идэтигэр үөрэнэр устудьуоннар колл-кииннэргэ, регистратураларга, ыарыһахтары кытта үлэҕэ, лабораторияларга уонна Саха сиригэр көтөн кэлээччилэри бэрэбиэркэлиир сиргэ.
«Сорох устудьуоннар бэйэлэрин доруобуйаларын аахсыбакка «кыһыл балаһаҕа» үлэлииллэр. Коронавируһу утары үлэҕэ бэйэлэрин кылааттарын киллэрэллэрин таһынан үөрүйэхтэрин сайыннараллар. Устудьуоннар быраастары кытта тэҥҥэ сарсыардаттан киэһээҥҥэ диэри коронавирус утары охсуһаллар. Онон салайааччылар устудьуоннарга төлөбүр боппуруоһун көрөллөрүгэр баҕарабыт», — диэн кини бэлиэтээтэ.
СӨ үөрэҕин уонна наукатын миниистирин бастакы солбуйааччыта Михаил Присяжнай медицина эйгэтин устудьуона волонтер быһыытынан кытыннаҕына инники үлэтигэр сабыдыаллыан сөбүн чопчулаата.
«Мин санаабар, медик-устудьуоннар бэйэлэрин холонон көрөллөр. Быраас идэтин толору баһылыырга бастаан медик-волонтер быһыытынан кыһалҕалаахтарга көмөлөһөр наада. Хас биирдии волонтер-устудьуоҥҥа махтанабын уонна сөптөөх суолу тутуспуттарын бэлиэтиибин. Кинилэр идэтийбит үлэһиттэри кытта алтыһа сылдьан үлэлииллэрэ сатабылларын чиҥэтэллэригэр көдьүүстээх буолуо», — диэтэ миниистири солбуйааччы.
Маны таһынан, СӨ үөрэҕин уонна наукатын миниистирэ Ирина Любимова бирикээһинэн биэдэмистибэ систиэмэтин администратордара колл-кииннэр үлэлэригэр кытталлар. Итиэннэ, доруобуйа харыстабылын тэрилтэлэрэ туһааннаах миэбэли, тиэхиньикэни уонна тырааныспары ылыахтара.
