Бу нэдиэлэ бүтүүтэ Кытайтан тиэрдиллиэхтээх медицинскэй мааскалар өрөспүүбүлүкэҕэ кэлиэхтэрэ. Бу туһунан Ил Дархан Айсен Николаев суруналыыстары кытта көрсүһүү кэмигэр иһитиннэрдэ.
«Маҥнайгы таһаҕас тиэйэр массыыналар бэҕэһээ, кулун тутар 29 күнүгэр айаҥҥа туруннулар. Билиҥҥи туругунан Кытайтан таһаҕас тиэрдиитин ирдэбилэ уларыйан турарын учуоттуохтаахпыт. Сорох суол өссө да сабыллан турар. Нэдиэлэ бүтүүтэ медицинскэй маскалары тутуохпут диэн эрэнэбит», — диэн Айсен Николаев эттэ.
Бородуукта, эмп-том уонна маҥнайгы ирдэнэр табаардар саппаастарынан өрөспүүбүлүкэ толору хааччыллыылааҕын Ил Дархан бэлиэтээтэ уонна олохтоохтору сымыйа сурахха итэҕэйбэттэригэр ыҥырда.
