Россияҕа IT-эйгэтигэр регион лиидэр буоларын көрдөрдө диэн РФ вице-премьерэ өрөспүүбүлүкэ киин куоратыгар үлэ сырыытын кэмигэр иһитиннэрдэ.
«Эһиги бырайыактаргыт интернет, сибээс, технология өттүнэн инники күөҥҥэ сылдьар регионнар икки ардыларыгар бастакы миэстэҕэ сылдьаллар. Ол курдук, эһиги бэйэҕит уокуруккут эрэ иһигэр бастакы буолбатаххыт, дойду үрдүнэн эмиэ», — диэтэ кини.
Ону тэҥэ өрөспүүбүлүкэ этиилэрин барытын РФ сыыппараҕа миниистирэ Максут Шадаев көрүөҕэ диэн Мишустин эттэ.
«Билигин балаһыанньа уустук, ол иһин платформаны көрүөххэ наада. Биһиги эһиги уопуккутун эрэ буолбакка, тугу эбии киллэриэххэ сөбүн, туох сакаас баарын учуоттуохпут», — диэн Михаил Мишустин эттэ.
Бүгүн, атырдьах ыйын 15 күнүгэр, Дьокуускай IT-пааркатыгар РФ премьер-миниистиригэр өрөспүүбүлүкэ IT-пааркатын резиденнарын бырайыактарын билиһиннэрдилэр. Ол иһигэр Арктикаҕа электроннай өҥө хаачыстыбатын сайыннарыы бырайыага интернет сыанатын 100 төгүл намтатыаҕа: 7,4 км уһуннаах ВОЛС ситимин тутуута былааннанна. Арктикаҕа түргэн тэтимнээх интернет киирдэҕинэ телемедицина өҥөтө, үөрэх уонна да атын салаалар сайдыахтара.
