Бастыҥ спортсмен, хотугу многоборьеҕа Саха сирин спордун маастара, байанайдаах булчут Артур Гермогенов төһө да тэрилтэтиттэн босхолонуулааҕын иһин анал байыаннай дьайыыга бэйэтин баҕа өттүнэн барбыта. Кини сырдык кэриэһигэр «Мин баарбын…» диэн ахтыылартан таҥыллан оҥоһуллубут олус истиҥ кинигэ сүрэхтэннэ.
Хорсун буойун ситэ олорботох олоҕун икки уолаттара салҕыахтара. Алдантан, Мэҥэ Хаҥаластан тардыылаах эр бэрдэ Сунтаарга күтүөттээн, олохсуйан, үүнэр көлүөнэни спорка уһуйан бэрт таһаарыылаахтык үлэлээбитэ. Кинини бииргэ үлэлээбит дьоно, доҕотторо олус иһирэхтик саныыллар.
Сунтаардааҕы 1-кы нүөмэрдээх оскуола бастыҥ учуутал аатын үйэтитиигэ многоборьеҕа оскуола оҕолоругар күрэҕи тэрийэн ыытта. Манна 20 уол саха эр киһитин кыаҕын-күүһүн тургутар спорт национальнай көрүҥнэригэр күрэхтэстилэр. Тэрээһиҥҥэ Артур ийэтэ, эдьиийэ, бииргэ төрөөбүттэрэ Мэҥэ Хаҥаластан кэлэн ыалдьыттаатылар.
«Эр санааланыы» уордьан кавалера анал байыаннай дьайыыга гранатометчигынан анаммыта, онтон кыраҕы харахтааҕын, сатабыллаҕын бэлиэтии көрөннөр снайперга көһөрбүттэрэ. Байыас улахан сорудахха баран тиһэх тыына быстыбыта.
