Ыам ыйыгар Дьабарыкы Хайа бөһүөлэгэр тутуллубут үрүҥ эһэ аатын талыыга Москватааҕы зоопарка куонкурус биллэриэҕэ.
«Эһэ этэҥҥэ сылдьар. Элбэҕи сатыыр буолла: бирэдимиэти батыһар, тииһин, баппаҕайын көрдөрөр. Барытын интэриэһиргиир, ситиһиилэриттэн, түргэнник ылынарыттан зоологтар күннэтэ соһуйаллар», — диэн зоопаркаҕа кэпсээтилэр.
Эһэ, хаар ыһар тэриллээх улахан килиэккэҕэ сылдьар. Маны таһынан, киниэхэ тоҥ минньигэстэри биэрэллэр. Балыгы уонна эти таһынан фруктаны сиирин сөбүлүүр, ордук грушаны. Эйгэтигэр чугаһатан аһын кистииллэр, араас оонньуурдары биэрэллэр.
Үрүҥ эһэни 2021 сыл ыам ыйыгар, Хотугу муустаах муораттан тыһыынча килэмиэтирдээх Дьабарыкы Хайаттан булбуттара. Россия айылҕаны кэтиир бөлөҕө түмсэн, Орто Дойду зоопаркатыгар илдьэр туһунан быһаарыы ылбыттара.
Ыам ыйын 23 күнүгэр кинини Москватааҕы зоопаркаҕа көһөрбүттэрэ. Онно 3-5 саастааҕа, баппаҕайа эмсэҕэлээбитэ, ыйааһына 136 киилэҕэ тэҥнэһэрэ биллибитэ.
