Кэбээйи улууһун Мукучу нэһилиэгэр балаҕан ыйын 2 күнүгэр саҥа оскуола арылынна. Үөрүүлээх линейкаҕа оҕолору уонна учууталлары Ил Дархан Айсен Николаев эҕэрдэлээтэ.
Саҥа икки этээстээх, 275 миэстэлээх оскуола уопсай тэнэ түөрт тыһ. тахса кв. м. тэҥ. Манна орто оскуола уонна Сайылык гимназията эргэ хаарбах тутууларыттан көһүөхтэрэ. Ону тэҥэ оскуолаҕа оҕо айар дьиэтэ киириэҕэ. Ол курдук, үөрэх тэрилтэтэ үс эбийиэги холбоото, туспа предметтэри дириҥник үөрэтэр оскуола аатын ылла.
«Мукучу оскуолата өрөспүүбүлүкэ баай историялаах оскуолаларыттан биирдэстэрэ буолар. Сэбиэскэй кэмҥэ манна дойду араас муннугуттан эдэр учууталлар үлэлии кэлэр этилэр. Оскуола Үлэ дьоруойа Михаил Спиридонов курдук дьону иитэн таһаарбыта. Кинилэр ситиһиилэрин нэһилиэнньэ дьоно билиҥҥи күҥҥэ диэри өйдүүр, үүнэр көлүөнэни кинилэр холобурдарынан үөрэтэр. Үөрэнээччилэр спортка, үөрэххэ ситиһиилэрдээхтэр. Бу эбийиэк тутуллубутун кэнниттэн оҕолор ситиһиилэрэ өссө элбээн биһигини үөрдүө диэн эрэнэбин», — диэн Айсен Николаев эттэ.
Эбийиэги 2016 сылга тутан саҕалаабыттар, ол эрээри тутуу үлэтэ тохтуу сылдьыбыт. 2021 сыллаахха дойду бэрэсидьиэнэ Владимир Путин көҕүлээбит «Үөрэҕирии» национальнай бырайыак чэрчитинэн тутуу үлэтэ салҕаммыт.
Оскуола кабинеттарыгар интерактивнай панеллар туруоруллубуттар, ону таһынан көмпүүтэр, робототиэхиньикэ кылаастара, лаборатория, саҥа «Труд» предметигэр аналлаах үөрэх мастарыскыайдара, икки лингафоннай хос, спортивнай уонна аактабай саалалар, медицинэ кабинета, бибилэтиэкэ, остолобуой бааллар. Ону таһынан тэпилииссэ, спортивнай былаһаакка оҥоһуллаллара былааҥҥа турар.
Хаартыска: Мария Васильева / ЯСИА
