В.А. Босиков аатынан СӨ Муусука Үрдүкү оскуолатын Россия «100 бастыҥ үөрэх кыһата» федеральнай реестрыгар киллэрдилэр.
Росстандарт тутула суох экспертизатын түмүгүнэн, үөрэх кыһата Россия уонна норуоттар икки ардыларынааҕы стандарт хаачыстыбатыгар толору эппиэттиир буолан үрдүк статус иҥэрилиннэ.
Муусука Үрдүкү оскуолатын бүтэрбиттэр Большой уонна Мариинскай тыйаатырдар сыаналарыгар кытталлар, аан дойду уонна Россия бастыҥ симфоническай оркестрдарыгар үлэлииллэр, престижнэй музыкальнай куонкурустар кыайыылааҕа, лауреата буолаллар. Бу барыта салалта, педагогическай кэллэктиип бэйэни харыстаммат үлэлэрин уонна талааннаах устудьуоннар көмөлөрүнэн ситиһилиннэ.
Россия бэрэсидьиэнэ Владимир Путин сорудаҕынан Дьокуускайга Муусука Үрдүкү оскуолатын саҥа аныгы комплексын тутуута барар. Эбийиэк 2026 сыл бүтүөр диэри үлэҕэ киирэрэ былааннанан турар.
