Бээһээ, кулун тутар 30 күнүгэр, Москва куоракка «Мы вместе.Спорт» норуоттар икки ардыларынааҕы форум саҕаланна. Манна Чурапчытааҕы култуура уонна спорт институтун делегацията Россия спордун миниистирин солбуйааччыта Алексей Морозов кыттыылаах «Совершенствование системы повышения квалификации тренеров и специалистов как результат гармонизации в области спорта и образования» төгүрүк остуолга кыттыыны ылла. Бу туһунан институт пресс-сулууспата иһитиннэрэр.
Манна 2023 сылга федеральнай ирдэбилгэ олоҕурбут тренердэри бэлэмнииргэ аналлаах саҥа бырагыраама туһунан кэпсэттилэр.
«Спорт сайдарын туһугар сокуоҥҥа кыра көннөрүү киирэрэ наада», — диэн төгүрүк остуолга бэлиэтээтилэр.
Беларуссия судаарыстыбаннай үнүбэрсиэтин ректорын Сергей Репкин дакылаата ордук болҕомтону тарта. Манна кини тренердэргэ квалификацияны үрдэтиигэ уопутун үллэһиннэ.
«Куурус ыытарга үнүбэрсиэт истээччилэри анал тест көмөтүнэн талар, эбэтэр тренер үлэтин тупсарарга тус былаан оҥоһуллар», — диэтэ кини.
Төгүрүк остуол түмүгэр, Россияҕа спорт өссө сайдарыгар саҥа санаалар этилиннилэр.
