Олунньу 11 күнүгэр Ил Дархан Айсен Николаев Нүөрүҥгүрү куоракка оройуон сайдыытын туһунан ыйааҕы толорууга уонна Нүөрүҥгүрү агломерациятын маастар-былаанын олоххо киллэриигэ анаммыт үлэ мунньаҕын ыытта.
Мунньахха өрөспүүбүлүкэ борокуруора, бырабыыталыстыба чилиэннэрэ, оройуон уонна куорат салайааччылара кытыннылар. Үлэ болдьоҕун уонна хаачыстыбатын иһин тус эппиэтинэһи уонна соруктары чопчулаатылар.
«Билигин улахан тиһиктээх үлэ бара турар. Доруобуйа харыстабылын, үөрэх, култуура уонна успуорт хас да уонунан эбийиэгэ тутулунна уонна хапытаалынай өрөмүөнү ааста. Куорат уулуссалара уонна суоллара саҥардыллаллар, дьон сынньанар сирдэрэ тэриллэллэр», — диэн өрөспүүбүлүкэ баһылыга эттэ.
Ол гынан баран, сорох хайысхаларынан улахан кыһалҕалар бааллар диэн Ил Дархан бэлиэтээтэ. Ол курдук, эбийиэктэри тутуу уонна өрөмүөннээһин болдьоҕо кэһиллэр түгэннэрэ тахсаллар. Ону кытта Чульман бөһүөлэгэр хаарбах дьиэттэн көһүөхтээх дьоҥҥо анаммыт дьиэлэр олус бытааннык үлэҕэ киирэллэр. Куонкуруснай процедуралар сыыһа ыытыллыбыттарыттан сылтаан, соруктары быһаарарга анаммыт харчы туһаныллыбакка хаалар диэн Айсен Николаев тоһоҕолоото.
«Маннык балаһыанньаны табыллыбат диэн сыаналыыбын. Нүөрүҥгүрү оройуонун сайыннарыы туһунан ыйааҕы уонна маастар-былааны олоххо киллэрии үлэтигэр олус кытаанахтык уонна эппиэтинэстээхтик сыһыаннаһыахха наада. Үлэ болдьоҕун кэһии тахсыа суохтаах», — диэн кини эттэ.
Хаартыска: Айсен Николаев MAX-ханаала
