Нам улууһугар сокуонунан кэргэннии буолууну регистрациялыырга эбии үс сир баар буолла.
Ол эбэтэр, олохторун холбуур дьон Эҥсиэли хочотун кэрэ көстүүлээх сиригэр-уотугар суолталаах докумуоннарын толотторор буолуохтара. Ол курдук, Дьокуускайтан Намныыр аартыкка «Үс Сэргэ» диэн ытык сиргэ, Максим Аммосов аатынан кытылга, «Эҥсиэли» култуура уонна сынньалаҥ пааркатыгар.
Бу олоххо киирэригэр СӨ ЗАГС управлениетын салайааччыта Дария Слепцова уонна 2 нэһилиэк баһылыктара сөбүлэҥ баттастылар.
Бу күн Намнааҕы ЗАГС дьиэтигэр 50, 55, 60 сыл бииргэ олорбут 3 ыалы чиэстээтилэр.
Дьоллоох дьиэ кэргэттэргэ СӨ «Дьиэ кэргэн килбиэнэ» бэлиэни туттардылар, кэргэнниилэр Нам улууһун кыһыл көмүс кинигэтигэр киирдилэр.
Бу курдук хатыламмат, үөрүүлээх түгэннэр аны ЗАГС эрэ дьиэтигэр буолбакка тапталлаахтар быһаарыныыларынан Нам историческэй миэстэлэригэр ыытыллыахтара.
