Россия бэрэсидьиэнэ Владимир Путин көҕүлээбит «Демография» национальнай бырайыак «Содействие занятости женщин – создание условий дошкольного образования для детей в возрасте до трех лет» федеральнай бырайыак чэрчитинэн Нам улууһун Кириэс-Кытыл сэлиэнньэтигэр 240 миэстэлээх уһуйааны арыйдылар. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.
«Сарыал» уонна «Кытылчаан» иитиллээччилэрэ «Тускул» саҥа уһуйааҥҥа кэлиэхтэрэ.
Саха сирин Ил Дархана Айсен Николаев аһыллыытыгар цифровой лабораторияны атыылаһарга аналлаах сертификат туттарда.
«Биһиги өрөспүүбүлүкэбит ыарахан даҕаны кэмнэргэ үөрэх саҥа эбийиэктэрин тутар кыаҕы булар этэ. Быйыл биһиги 14 уһуйааны үлэҕэ киллэрэбит. Хамаҕатта олус үчүгэй бэлэҕи ылбытыттан үөрэбин. Дьиэ үрдүк хаачыстыбалаахтык балтараа сыл иһигэр тутулунна. «Прогресс» хампаанньа тутааччыларыгар махтанабын. Кинилэр биһиги биэдэмистибэлэрбитин кытта тэҥҥэ олохтоотулар. Туһааннаах докумуоннар оҥоһуллаллар, оттон лицензиялааһыны аастаҕына, кэлэр сыл саҕаланыыта уһуйаан үлэлиэҕэ», — диэтэ кини.
Үс этээстээх дьиэҕэ музыка уонна спорт саалалара, медицинскэй хос, көмпүүтэр кылааһа, логопед уонна психолог хоһо, аһыыр блок бааллар. Олбуор иһигэр күүлэйдиир уонна спортивнай былаһааккалары оҥорбуттар, оттон уһуйааҥҥа видеонан кэтээн көрөр, харабыллыыр уонна баһаарынай сигнализация ситимин туруорбуттар.
«Тускул» оҕо уһуйаана 2022 сылга докуомуон үлэтэ быһаарылыннаҕына оҕолору ылан саҕалыаҕа. Манна оҕолору саастарынан кыра, орто, улахан бөлөхтөргө арааран, 12 бөлөх үлэлиэҕэ.
Эбийиэк тутуута сайын 2020 сылга саҕаламмыта, сыаната 383,2 мөлүйүөн солкуобай, итинтэн улахан өттө федеральнай бүддьүөттэн көрүллүбүтэ.
