Балаҕан ыйын 16 күнүгэр Татарстан Өрөспүүбүлүкэтигэр «Төрөөбүт тыл уонна литература бастыҥ учуутала — 2024» бүтүн Россиятааҕы куонкурус түмүктүүр түһүмэҕэ саҕаланна. Манна Россия 79 регионуттан 112 педагог кыттар – төрөөбүт тыл учууталлара уонна уһуйаан иитээччилэрэ.
Куонкуруска Нам 1 №-дээх орто оскуолатын төрөөбүт тыл уонна литература учуутала, «Төрөөбүт тыл уонна литература бастыҥ учуутала — 2024» регионнааҕы түһүмэҕин кыайыылааҕа Лариса Дмитриевна Данилова Саха сирин аатыттан кыттар.
Быйылгы куонкуруска учууталлар Россия норуоттарын 36 тылын куонкуруска билиһиннэрэллэр. Ол иһигэр нуучча, татаар, чеченскэй, башкирскай, вепсскай, долган, корякскай, нанайскай, ненецкэй, нивхскай, удэгейскэй, хантыйскай, шорскай уонна эбэҥки.
Куонкурус сүрүн сыалынан Россия норуоттарын тылларын уонна култуураларын өйөөһүн буолар.
Балаҕан ыйын 17-19 күннэригэр куонкурус бастакы түһүмэхтэрэ буолаллар. Педагогтар дьүүллүүр сүбэ уонна учууталлар иннилэригэр бэйэлэрин билиилэрин, сатабылларын, дьоҕурдарын көрдөрүөхтэрэ. Ону тэҥэ куонкурус чэрчитинэн оскуола оҕолоругар төрөөбүт тыл уонна литература уруогун ыытыахтара.
Элбэх баалы ылбыт 15 кыттааччы иккис түһүмэххэ киирэр. Балаҕан ыйын 20 уонна 21 күннэригэр куонкурус кыттааччылара оскуола үөрэнээччилэригэр уруок таһынааҕы дьарык ыытан көрүөхэтэрэ уонна төрөөбүт тылы уонна литератураны үөрэтиигэ бэйэлэрин педагогическай методикаларын көдьүүһүн сырдатыахтара.
Балаҕан ыйын 21 күнүгэр куонкурус кыайыылаахтарын быһаарыахтара. Кыайбыт учуутал 250 тыһ. солк сууманан наҕарааланыаҕа.
