Бэҕэһээ, балаҕан ыйын 15 күнүгэр, М.К. Аммосов аатынан култуура уонна духуобунай сайдыы дыбарыаһыгар Бүтүн Россиятааҕы «ВМЕСТЕ МЫ – РОССИЯ!» бэстибээл-бырааһынньык чэрчитинэн бырааһынньыктааҕы кэнсиэр буолан ааста. Бу туһунан улуус телеграм ханаала иһитиннэрдэ.
Бу күн Россия араас муннуктарыттан – Нам улууһуттан «Ньургуһун» народнай үҥкүү-хор кэллэктиибэ, А.Ф. Шестаков аатынан улуустааҕы норуот айымньытын дьиэтин «Коробейники» ансаамбыла, А.Н. Окоемов аатынан «Мичээр» үҥкүү народнай ансаамбыла, «Добун» эр дьон вокальнай ансаамбыла, Хакасияттан аан дойдутааҕы уонна Бүтүн Россиятааҕы конкурстар кыайыылааҕа Аржан Тодош, Кемеровскай уобаластан «Русь» Россия үтүөлээх кэллэктиибэ, Иркутскай уобаластан «Зарев цвет» народнай фолк-группа, Красноярскай кыраайтан «Сибирская вечора» ансаамбыл, Забайкальскай кыраайтан «Берегиня» народнай фольклорнай бөлөҕө, Томскай уобалас «Вайнах» чечено-ингушскай автономиятыттан «Даймохк» ансаамбыл, Новосибирскай уобаластан «Сибирские узоры» норуот үҥкүүтүн ансаамбыла, Тываттан «Амырга» фольклорнай ансаамбыл бэйэлэрин баай култуураларын, үтүө үгэстэрин, ырыаларын-үҥкүүлэрин дьоҥҥо-сэргэҕэ көрдөрдүлэр.
Бэстибээл кыттыылаахтарын Нам улууһун баһылыгын солбуйааччы Юрий Дьяконов, өрөспүүбүлүкэтээҕи норуот айымньытын уонна социально-культурнай технологиялар дьиэлэрин директора Сергей Семенов эҕэрдэлээтилэр.
Россия норуоттарын култууратыгар, үйэлээх баайдарыгар анаммыт бырааһынньык тэрээһин өрө көтөҕүллүүлээхтик ааста. Маны сэргэ Нам улууһун тарбаҕар талааннаах маастардарын оҥоһуктарын быыстапка-атыыта тэрилиннэ.
Көрөөччүлэр Модун Россия норуоттара биир дьиэ кэргэн курдук сомоҕолоһон айа-тута сылдьалларын илэ харахтарынан көрөн олус дуоһуйан тарҕастылар.
Бу курдук Россия норуоттара бары бииргэ сомоҕо күүһүнэн дириҥ төрдүлэрин үүнэр көлүөнэҕэ тириэрдэ турдуннар, ыччаты үйэлэри уҥуордаан кэлбит сыаннастарга, үгэстэргэ ииттиннэр.
