Нам улууһун тыатын хаһаайыстыбатын управлениетын салайааччыта Владимир Макаров улууска оттооһун хаамыытын туһунан «Тэтим» араадьыйаҕа иһитиннэрдэ.
«Быйыл сайыммыт саҕаланыыта кэмигэр ардах түһэн сир дойду көҕөрбүтэ, от тахсыыта, үүнүүтэ да үчүгэй. Ол эрээри уу бытааннык түһэн уонна кэлин уу эбиллэн, онно ардах түһэн мэһэйдэри үөскэтэр, билигин да намыһах сирдэр ууга сыталлар, от үүнүүтүн биллэрдик бытаардар. Билигин дьон үрдүк сирдэргэ оттуур. Арыыларга оттуурга үс баржа баар буолан сырыы баар. Отчуттар тиэхиньикэлэрин баржанан туората сылдьаллар. Куйаас күнү-дьылы баттаһан, былырыыҥҥы көрдөрүүнү ситэн, графикка киирэр соруктаах оттууллар. Ленскэйгэ, Өлүөхүмэҕэ баар коллегаларбытын кытта өрүү сибээскэ сылдьабыт», – диэн салайааччы эттэ.
Быйыл сайын Нам улууһугар 27 391 туонна от оттонуохтаах. От ыйын 25 күнүнээҕи туругунан улуус үрдүнэн 4050 туонна от оттонно. Владимир Макаров этэринэн, бу күннэргэ былаан 30%-ҥа тиийиэхтээҕин уу кэлэн отчуттарга элбэх ыарахаттары аҕалла.
«Былырыын сайын Таастаахха, Салбаҥҥа улахан ойуур баһаардара буолбуттарын бары билэбит, ол түмүгэр оттуур сирдэрэ эмсэҕэлээн, билигин да ууга сыталлар. Онтон улууспут 7 мобильнай биригээдэни үлэлэтэр соруктаах. Оттон тэриллэр мобильнай биригээдэлэр 60 км. ыраах сирдэргэ баран оттуохтара, ол курдук, Тулагыга Улахан Кустуур арыыга, Горнай улууһун Улуу Сыһыытыгар уонна улууспут иһигэр Харбаайыга, Фрунзе нэһилиэгин сирдэригэр. Ити курдук улууспут отчуттара көрсөр мэһэйдэри аахсыбакка, от былаанын толорорго, кыстыгы этэҥҥэ туоруур аһылыгы бэлэмнииргэ бары кыаҕы толору туһанан үлэлииллэрэ эрэйиллэр», – диэн Макаров түмүктээтэ.
