Саха сирин искусствотын үтүөлээх үлэһитэ Наталья Посельскаҕа анаммыт быыстапка «Россия – Моя история» историческай пааркаҕа бүгүн арылынна. Быыстапканы «Космос Натальи Посельской» диэн ааттаатылар.
«Быыстапкаҕа Посельская тус маллара, статуэткалар, хаартыскалар киирдилэр», — диэн иһитиннэриигэ этиллэр.
1992 сыллаахха Наталья Посельская көҕүлээһининэн Жирков аатынан Дьокуускайдааҕы музыкальнай училищеҕа хореография салаата арыллыбыта, кэлин, 1995 сыллаахха өрөспүүбүлүкэтээҕи хореографическай училище буолбута. Наталья Посельская училище солбуллубат дириэктэрэ этэ, 2004 сыллаахха училищеҕа ийэтэ Аксения Посельская аатын иҥэрбиттэрэ. Кини хас да көлүөнэ искусство үлэһиттэрин иитэн таһаарбыта, элбэх научнай үлэ ааптара. Быыстапка ыам ыйын 12 күнүгэр диэри үлэлиэҕэ.
