Кыыл Уола С. Зверев аатынан национальнай үҥкүү тыйаатыра «Мы-Россия: эпос и ритмы в Поволжье» диэн Уфатааҕы уус-уран училище устудьуоннарын уонна преподавателлэрин кытта көрсүһүү тэрийдилэр.
Тыйаатыр дириэктэрэ Саргылана Борисова гостуруол бырагырааматын кытта билиһиннэрдэ уонна тыйаатыр сыалын-соругун, үлэтин туһунан кэпсээтэ.
«Кыл Саха» этническэй музыка ансаамбылын салайааччыта Анна Томская ураты сахалыы инструменнарын киэҥ эйгэҕэ билиһиннэрии, тарҕатыы туһунан кэпсээтэ. Саха сирин норуодунай маастара Руслан Габышев бэйэтин илиитинэн айбыт ураты ох-сааа кыл («музыкальный лук») музыкальнай инструменын көрдөрөн болҕомтону тарта.
Уфатааҕы училище дириэктэрин үөрэх чааһыгар солбуйааччы Владимир Жирнов училище араас регионнары кытта бииргэ үлэлээһини сайыннарарга бэлэмнээҕин иһитиннэрдэ, чуолаан Дьокуускайдааҕы музыкальнай колледжы кытта бииргэ үлэлээһин туһунан сөбүлэһии түһэрсэр ураты баҕатын тоһоҕолоон бэлиэтээтэ.
Көрсүһүү «Кыл Саха» ансаамбыл музыканнарын уонна устудьуоннар холбоһуктаах музыкальнай импровизацияларынан түмүктэннэ. Бу уопут култуурнай нэһилиэстибэни сайыннарыыга уонна эдэр көлүөнэни национальнай култуура уратытын харыстааһыҥҥа көмөлөһөр айымньылаах бииргэ үлэлээһин чаҕылхай холобура буолар.
