Көтөр-түһэр балаһаны саҥардыы үлэтэ түөрт ыйга диэри аччатыллыбытынан, Нерюнгри аэропорда үлэтин сэтинньи 1 күнүттэн сөргүтүөҕэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Нерюнгри оройуонугар дьыалабыай сырыытын чэрчитинэн, Ил Дархан Айсен Николаев Чульман бөһүөлэгэр баар аэропортка сырытта. Өрөмүөн үлэтэ от ыйын 1 күнүгэр саҕаланыаҕа, эбии тиэхиньикэ уонна үлэһит көрүллэн, балтараа сыл устата барыахтаах үлэ түөрт ыйынан түмүктэниэҕэ.
Ону тэҥэ, өрөспүүбүлүкэ баһылыга, Чульман олохтоохторун кытта көрсүһүүгэ оскуолаҕа киириигэ асфальт суолу оҥоруу 2021 сылга саҕаланыахтааҕын, маны таһынан, кини 9-с №-дээх оскуола саҥа дьиэтин тутуу боппуруоһун көтөхтө.
2022 сыл балаҕан ыйыгар Чульмаҥҥа «Газпром — оҕолорго» бырагырааманан 3,7 тыһыынча квадратнай миэтэрэ иэннээх, 150 киһиэхэ сөптөөх катоктаах физкультурнай-чэбдигирдэр комплекс үлэҕэ киириэҕэ.
Айсен Николаев Нерюнгри оройуонугар ипотеканан олорор дьиэни тутуу комплекснай бырайыагын туһунан кэпсээтэ, ол чэрчитинэн, бастакы взноска, эбэтэр бырыһыан ставкатыгар субсидия көрүллүөн сөп.
