Нерюнгри куоратын уонна Нерюнгри оройуонун 45 сыллаах үбүлүөйүнэн эбэҥки салайан ыытааччыларыгар, сирдьиттэригэр аналлаах пааматынньык аһылынна. Бу туһунан оройуон дьаһалтатын пресс-сулууспата иһитиннэрэр.
Пааматынньык өрөспүүбүлүкэҕэ бастаан кэлбит дьоҥҥо айылҕа баайын билиһиннэрбит ыытааччыларга ананна. 2019 сылга оройуон баһылыга Виктор Станиловскай Иенгра олохтоохторун көҕүлээһиннэрин өйөөн, бастыҥ оҥоһууга аһаҕас айар куонкурус тэриллибитэ.
Кыайыылааҕынан мокватааҕы архитектор Виктор Никифоров, скульптор Сергей Цветков уонна худуоһунньук-дизайнер Афанасий Мучин састааптаах айар бөлөх ааттаммыта. Пааматынньыкка боруонсаттан оҥоһуллубут ыытааччы, геологтар, таба уонна ыттар, бэлиэ аарка оҥоһуллубуттар.
«Пааматынньыкка эбэҥки норуотун итэҕэлин бэлиэлэрэ: өбүгэ тыынын, үөһээ дойду айыыларын кытта ситимнээх тиит мас, уонна үс дойдуну ситимниир ытык көтөр — туруйа ойууламмыт», — диэн иһитиннэриигэ этиллэр.
Пааматынньыгы аһыы бочуоттаах бырааба Иенгра эдэр олохтооҕор Арсен Еноховка уонна Бута уус убаастабыллаах баһылыгар, биллиилээх булчут, Уһук Илиҥҥи Улукиткан каартатын оҥорууга элбэх экспедициялар сирдьиттэрин удьуора Альбина Завьяловаҕа тигистэ.
