Саха сириттэн хапсаҕайга өрөспүүбүлүкэ муҥутуур кыайыылааҕа, Муома улууһуттан төрүттээх Никита Хабаров Россия аатыттан Аан дойдутааҕы Көс омуктар оонньууларыгар кыттарга бэлэмнэнэр. Кини хапсаҕайга муҥутуур кыайыылааҕы быһаарар турнирга киирсиэҕэ. Саха спордун көрүҥэ улахан күрэхтэһиигэ бастакытын киирэр. Бу туһунан СИА иһитиннэрэр.
Аан дойдутааҕы Көс омуктар оонньуулара атырдьах ыйын 31 күнүгэр Кыргызстаҥҥа саҕаланар. Уопсайа спорт 43 көрүҥэр күрэхтэһиилэр ыытыллыахтара. Хапсаҕай оонньууларга бастакытын киирбитэ. Муҥутуур кыайыылааҕы быһаарар күрэхтэһии балаҕан ыйын 4 күнүгэр буолуоҕа.
Билиҥҥи кэмҥэ хапсаҕайга Беларусь, Венгрия, Греция, Индия, Иран, Казахстан, Кыргызстан, Молдов, Монголия, Нидерланды, Пакистан, Польша, Россия, Северная Македония, Таджикистан, Узбекистан, Франция уонна Эстония дойдулартан бөҕөстөр кытталлара биллэр. Россия хамаандатыттан Никита Хабаров соҕотох күрэхтэһэр.
