Хаҥалас улууһугар СӨ бастакы бэрэсидьиэнэ Михаил Николаев аатынан II Николаевскай форум ыытыллыаҕа. Манна Саха сирин араас улуустарыттан 100-чэкэ эдэр исписэлиис кытта кэлиэҕэ.
Өрөспүүбүлүкэ 300 кэриҥэ эдэр исписэлииһэ быйылгы форум кыттыылааҕа буолуон баҕарбыта. Кинилэр ортолоруттан сүүсчэкэ эдэр ыччат бэрэстэбиитэлин сүүмэрдээн таллылар.
«Быйылгы форум өссө элбэх кыттааччылаах буолуоҕа. Үгэс быһыытынан Саха сирин бары улуустарын хаба сатаатыбыт. II Николаевскай форум төрүт сыаннастары бөҕөргөтөр, эдэр ыччат гражданскай эппиэтинэһин сайыннарар хайысхалаах. Онон биһиги бырайыакпытыгар муниципальнай тэриллиилэртэн эдэр ыччат бэлиитикэтин бэрэстэбиитэллэрэ кыттыыны ылалларыттан олус диэн үөрэбит. Хас биирдиигит форумҥа кыттыбытыттан туһаны ыллын диэн, бэйэҕит этиилэргитин улуустаргытыгар олоххо киллэрэн өрөспүүбүлүкэбитин сайыннарыаххыт диэн эрэнэн туран, биһиги ис хоһоонноох, олус интэриэһинэй бырагырааманы бэлэмнээтибит», — диэн тэрийээччилэр бэлиэтээтилэр.
Ол курдук, Николаевскай форум иккис сылын эдэр ыччат уопут атастаһар, долгутар боппуруостары дьүүллэһэр дьоһун былаһаакката буолуоҕа.
Бастакы Николаевскай форум хайдах ааспытын видеоҕа көрүҥ, сэргээҥ!
Саха Өрөспүүбүлүкэтин бастакы бэрэсидьиэнэ Михаил Николаев аатын үйэтитэр 2-с Николаевскай форум Иркутскайдааҕы ньиэп хампаанньатын, «Саха сирин тимир суоллара акционернай хампаанньа» АУо, «Анаабыр алмаастара» АУо, СӨ бастакы бэрэсидьиэнин пуондатын өйөбүлүнэн ыытыллар.
Информационнай партнердар: НВК «Саха», «Якутия 24», «РИИХ Сахамедиа» АУо, ЯСИА, Якутия Daily, Саха Сирэ, ГАУ РС(Я) «Сахапечать», Ulus Media.
