Олунньу 27-28 күннэригэр Ф.И. Авдеева аатынан Оҕо айыммньытын дыбарыаһыгар
«Нотки радости» оҕолорго өрөспүүбүлүкэтээҕи ырыа күрэҕэ үрдүк таһымнаахтык буолан ааста.
Бу күрэххэ Орто Халыматтан, Өлөөнтөн, Мииринэйтэн, Өлүөхүмэттэн дистанционно, ону тэҥэ Ньурбаттан, Бүлүүттэн, Кэбээйиттэн, Амматтан, Мэҥэ Хаҥаластан уо.д.а. улуустартан 400-тэн тахса талааннаах оҕо-аймах айаннаан кэлэннэр кыттыыны ыллылар.
Ол түмүгэр кылаан чыпчаал үрдүк аатын Бүлүү куоратын 3 -үс нүөмэрдээх Дьоруой Николай Саввич Степанов аатынан оскуола алтыс кылааһын үөрэнээччитэ Алексеев Альберт ( сал. Сивцева Матрена Петровна) ылан, кубогынан, дипломунан наҕараадаланна уонна смарт-телевизоры бэлэх тутан үөрүүтэ үксээтэ.
Күрэх СӨ ырыа айааччыларын Сойууһун чилиэнэ, эбии үөрэхтээһин аҕа уһуйааччыта Анастасия Афанасьевна Третьякова (Соловьева) көҕүлээһининэн төрдүс төгүлүн ыытылынна.
«Нотки радости-2024» дойдубутугар Дьиэ кэргэн сылыгар, өрөспүүбүлүкэҕэ Оҕо- аймах уонна Фатия Иннокентьевна Авдеева 100 сааһыгар ананна.
