НВК САХА — Нур-Султан куоракка буола турар аан дойду тустууга чемпионатыгар Саха сирин бөҕөстөрүн утарсааччыларынан Иран спортсмена Реза Арти, Америка холбоһуктаах штаттарыттан Дайтон Фикс уонна Монголияттан сылдьар Тумур-Очир Тулга буолуохтара. Бу туһунан «Спорт Якутии» хаһыат иһитиннэрэр.
Бүгүн балаҕан ыйын 19 күнүгэр икки олимпийскай категориялаах ыйааһын: 57 уонна 65 киилэҕэ диэри ыйааһыннаахтар күөн көрсүөхтэрэ.
«Саамай чэпчэки ыйааһыҥҥа 2020 сылга Токиоҕа ыытыллар Олимпийскай оонньууларга кыттар путевка иһин саха икки уола бүгүн көбүөргэ тахсыаҕа. Европа чемпионатын түөрт төгүллээх призера, Аан дойду чемпионатын боруонса мэтээлин хаһаайына Владислав Андреев Беларусия сүүмэрдэммит хамаандатыттан кыттыаҕа. Континеннар икки ардыларынааҕы чемпионат боруонса мэтээлин хаһаайына Владимир Егоров Македония аатыттан кыттар», — диэн этиллэр.
Маҥнайгы эргииргэ Владислав Андреев Азия чемпиона, Иран бөҕөһө Реза Атрины кытары күөн көрсүөҕэ. Онтон Владимир Егоров утарсааччытынан 21 саастаах, 2017 сыллаахха Аан дойду бастыыр иһин күрэһин кыайыылааҕа Дайтон Фикс (АХШ) буолуоҕа.
65 киилэҕэ диэри ыйааһыҥҥа Беларусия аатыттан кыттар Ньургун Скрябин утарсааччытынан Азия спортсменнарын 23 саастарыгар диэри бөлөх чемпиона Тумур-Очир Тулга буолуоҕа.
