Ньурба улууһун Маар уонна Күндээдэ нэһилиэктэригэр ыксаллаах быһыы-майгы эрэһиимэ биллэрилиннэ. Бу туһунан улуус дьаһалтатын пресс-сулууспата иһитиннэрэр.
«Нэһилиэнньэлээх пууннарга куттал үөскээбитинэн сибээстээн Түмүк уонна Күндээдэ нэһилиэктэригэр ыксаллаах быһыы-майгы эрэһиимэ биллэрилиннэ», – диэн этиллэр.
Түмүк нэһилиэгин Эдьигээн сиригэр хаһыс да күнүн 110 гектар иэннээх сиргэ ойуур баһаара баара этиллэр, ол иһигэр 60 гектар иэннээх сиргэ үөһэнэн баһаар баара бэлиэтэнэр. Бэс ыйын 3 күнүн туругунан ойуур баһаара Маар сэлиэнньэтиттэн үс килэмиэтирдээх сиргэ тиийбит.
Уоту умуруорууга Якутлесресурс 41 үлэһитэ, 30 олохтоох дьон уонна 18 тиэхиньикэ кыттыыны ылар. Ону тэҥэ Якутлесресурс уонна Авиалесоохрана 19 үлэһитэ мобилизацияланна.
Бүгүҥҥү күҥҥэ уот тулатынан баһаары сэрэтэр хаһыы оҥоһулунна. Нэһилиэнньэлээх пууннарга уонна экономика эбийиэктэригэр куттал суоһаабата бэлиэтэнэр.
Күндээдэ нэһилиэгин Ньыла сиригэр үөскээбит 3 гектар иэннээх ойуур баһаара саҥа сиргэ тарҕаммыт. Ону тэҥэ улууска ойуур баһаардарын муҥутуур кутталын үрдүкү кылааһа салҕанар — кэлэр күннэргэ кураан уонна тыаллаах буолуора сабаҕаланар.
Икки нэһилиэккэ уоту умуруорууга быстала суох төгүрүк күннээх үлэ ыытыллар. Ыксаллаах быһыы-майгы эрэһиимэ ойуур баһаарын утары охсуһууга эбии күүс-көмө кэлиитин уонна үбү хааччыйар кыах биэриэҕэ.
