«Культура» национальнай бырайыагынан «Култуура эйгэтэ» федеральнай бырайыак чэрчитинэн тутуллар Ньурбатааҕы көһө сылдьар тыйаатыр дьиэтин сэтинньигэ үлэҕэ киллэрэргэ былаанныыллар. Бу туһунан СӨ бырабыытылыстыбатын уонна баһылыгын дьаһалтатын пресс-сулууспата иһитиннэрэр.
Тутуу хаамыытын кытта Саха сирин Ил Дархана Айсен Николаев Ньурбаҕа сырыытын кэмигэр билистэ.
«Биһиги бүгүн оройуон социальнай экономическай сайдыытын кытта билистибит. Ньурба оройуона — өрөспүүбүлүкэҕэ биир сайдыылаах оройуон буолар. Улуус тыа хаһаайыстыбатын хайысхатыгар эрэ буолбакка, бырамыысыланнаска эмиэ кэккэ көрдөрүүлэрдээх. Билигин элбэх социальнай эбийиэк тутуллара киһини үөрдэр. Ньурба тыйаатырын саҥа дьиэтэ бары ирдэбиллэргэ барытыгар эппиэттиир. Дойду кыра куораттарыгар биир бастыҥ тыйаатыр буолуоҕа. Кэлэр ыйдарга тутуу үлэлэрэ түмүктэниэхтэрэ уонна саҥа сезону тыйаатыр саҥа эбийиэккэ көрсүөҕэ», — диэн кини бэлиэтээтэ.
Эбийиэги 2019 сылтан тутан саҕалаабыттара, бүгүҥҥү күҥҥэ үлэлэр түмүктүүр түһүмэххэ сылдьаллар. Билигин тутааччылар дьиэ сарайын, сыанатын оҥороллор, оборудованиены таҥаллар уонна уот ситимин тардаллар.
Эбийиэк тутуутугар 540 мөлүйүөн солкуобай көрүллүбүтэ.
