Ньурба улууһугар доруобуйа харыстабылын систиэмэтин сайыннарыы туһунан сөбүлэһии чэрчитинэн фельдшерскай-акушерскай пууннары, амбулаториялары уонна балыыһа комплексын тутуохтара. Бу туһунан СӨ бырабыытылыстыбатын уонна баһылыгын дьаһалтатын пресс-сулууспата иһитиннэрэр.
Тустаах сөбүлэһиигэ СӨ вице-премьерэ Ольга Балабкина уонна оройуон баһылыга Алексей Иннокентьев илии баттаатылар.
«Сөбүлэһии олоххо киирдэҕинэ улуус олохтоохторугар медицинскэй көмө хаачыстыбата үрдүөҕэ, оройуон доруобуйатын харыстабылын систиэмэтин тупсарыаҕа. Бу киирэр уларыйыылары хас биирдии улуус олохтооҕо туһанара улахан суолталаах», — диэн Ил Дархан Айсен Николаев эттэ.
Докумуоҥҥа Ньурбаҕа балыыһа комплексын тутуутун түмүктэниитэ, «Доруобуйа харыстабыла» национальнай бырайыак чэрчитинэн 70 куойкалаах балыыһа тутуута киирбиттэр. Ону тэҥэ судаарыстыбаннай бүддьүөт суотугар амбулаториялары уонна фельдшерскэй пууннары үлэҕэ киллэриэхтэрэ, улуус медицинскэй тэрилтэлэригэр саҥа тырааныспардары атыылаһыахтара.
«Борьба с сердечно-сосудистыми заболеваниями» федеральнай бырайыак чэрчитинэн Ньурбатааҕы киин балыыһа сүрэх-тымыр салаатын саҥа оборудованиенан хааччыйыахтара.
