XXIV бүтүн Россиятааҕы «ТЭФИ-Регион» телевизионнай куонкурус бастакы түһүмэҕэ алтынньы 2-5 күннэригэр Светлогорскайга ыытыллар. Быйылгы сылга куонкуруска Россия 82 нэһилиэнньэлээх пуунуттан 629 үлэ кыттар. «Оонньуу киинэ/сериал» анал аакка үс финалист кыайыыга дьулуһар. Кинилэртэн биирдэстэрэ — НВК «Саха» оҥорбут «Уот Дьулустаан» киинэтэ.
Бу туһунан TEFI_Russia ТГ-ханаалыгар иһитиннэрдилэр.
Номинацияҕа, саха элбэх сиэрийэлээх киинэтиттэн ураты, Калуга «Ника» телерадиокомпаниятын «Останься» диэн веб-сериалын уонна ООО «Севастополь Тутулуга суох телевидениетэ» оҥорбут «Дети русской Трои» хартыынатын эмиэ көрөллөр.
Сериал туһунан.
«Уот Дьулустаан» — XX-с үйэ иннинээҕи революция кэмигэр саха норуотун олоҕо көстөр. Драма саха прозаига Валентина Гаврильева айымньытыгар олоҕуран уһуллубут. Литературнай айымньыны Катерина Григорьева (Кэрэмэс Сыдьаай) сценарийынан режиссёр Елена Эверстова киинэҕэ көрдөрдө.
20 сиэрийэлээх сериалы НВК «Саха» ханаалыгар быйыл тохсунньу 27 күнүттэн көрдөрбүттэрэ.
«ТЭФИ-Регион».
Куонкурус 18 анал аатынан ыыталлар, ол иһигэр быйылгы сылга анаммыт икки анал номинациянан: «Россияны саҥаттан арыйабыт!» (номинацияны Россия Телевидениетин Академията уонна Нуучча географическай уопсастыбата тэрийбиттэрэ) уонна «Аҕа дойду Улуу сэриитигэр Кыайыы 80 сыла».
Саамай элбэх үлэни бу анал ааттарга көрөллөр:
▫️ Анал номинация «Россияны саҥаттан арыйабыт!» — 92 үлэ.
▫️ Анал номинация «Аҕа дойду Улуу сэриитигэр Кыайыы 80 сыла» — 80 үлэ.
▫️ «Телевизионнай докумуоннаах киинэ/сириал» — 53 үлэ.
▫️ «Репортёр» — 53 үлэ.
