Саха сиригэр сыллата нэһилиэнньэни өйүүр өрөспүүбүлүкэтээҕи бырагыраамалар үптэрэ-харчылара элбии турар.
«Бүтэһик биэс сыл иһигэр оҕолордоох дьиэ кэргэттэргэ өйөбүл аҕыс төгүл үрдээтэ», – диэн СӨ социальнай сайдыытын уонна үлэтин миниистирэ Елена Волкова «Актуальное интервью» биэриигэ иһитиннэрдэ.
Елена Волкова бэлиэтииринэн, регион дьаһалтата элбэх оҕолоох дьиэ кэргэн, дьон-сэргэ олоҕо тупсарыгар анаан миэрэлэри ылыр, олоххо киллэрэр.
2019 сылтан «Демография» национальнай бырайыак чэрчитинэн бастакы, иккис уонна үһүс оҕо төрөөһүнүгэр дьиэ кэргэҥҥэ көмө миэрэлэрэ көрүллүбүттэрэ.
Ол курдук, 2022 сыл тохсунньу 1 күнүттэн оҕо төрөөтөҕүнэ «Дети столетия» капитал бэриллэр. Ил Дархан Айсен Николаев көҕүлээһининэн капитал 2027 сыл бүтүөр диэри өссө биэс сылынан уһаан биэрдэ. 2024 сылга капитал кээмэйэ 110 775 солкуобайга тэҥнэһэр.
Бу сылга өрөспүүбүлүкэтээҕи «Дьиэ кэргэн» ийэ капитала икки төгүл үрдээтэ. Капитал 151 690 солкуобайтан 300 тыһыынча солкуобайга диэри улаатта.
РФ бэрэсидьиэнэ Владимир Путин дьиэ кэргэн, оҕо төрөөһүнүн боппуруостарыгар анал болҕомто уурар. 2019 сылтан бэрэсидьиэн көҕүлээһининэн «Демография» национальнай бырайыак үлэлиир.
Бу күннэргэ кини «О мерах социальной поддержки многодетных семей» ыйаахха илии баттаата. Докумуоҥҥа элбэх оҕолоох дьиэ кэргэҥҥэ үс уонна үстэн элбэх оҕолоох дьиэ кэргэн киирсэр.
