3-16 саастаах оҕолорго Владимир Путин киллэрбит 10 000 солк. көмө харчытын Саха сирин ыаллара номнуо ылан эрэллэр. «Мин оҕом биэс саастаах уонна 10 тыһ. солкуобайдаах босуобуйаҕа хапсабыт. Сайабылыанньабын судаарыстыбаннай өҥө сайтынан ыам ыйын 13 күнүгэр ыыппытым. Ыам ыйын 30 күнүгэр электроннай почтабар сайаапкабын аһардыбыттарын туһунан сурук кэлбитэ. Бүгүн харчы счеппар түстэ. Судаарыстыбаҕа улахан махталбын тиэрдэбин», — диэн Дьокуускай олохтооҕо Аксинья Семенова кэпсиир.
Биэнсийэ пуондатын дааннайынан, Саха сиригэр 180 тыһыынча кэриҥэ дьиэ кэргэн 10 000 солк. босуобуйаны ылыахтарын сөп. Маны таһынан, үс сааһыгар диэри саастаах, Ийэ хапытаалын ылар оҕолорго 5000 солк. көмөҕө сайаапканы алтынньы 1 күнүгэр диэри туталлар.
