Өрөспүүбүлүкэтээҕи суһал штаб салайааччытын солбуйааччыта Ольга Балабкина, оҕолору уонна хат дьахталлары, быһыыны ылар кыахтара суох араҥа буолалларынан, COVID-19-тан уопсай вакцинация эрэ көмүскүүрүн туһунан бэлиэтээтэ.
Кэлиҥҥи нэдиэлэҕэ, ыалдьан балыыһаҕа киирбит оҕо ахсаана элбээбитин туһунан вице-премьер эттэ. Онон оҕо инфекционнай балыыһатыгар эбии куойка тардылынна.
Саҥа үөрэх дьылыгар: үөрэх тэрилтэлэрин, оҕо уһуйааннарын, эбии үөрэх кыһаларын үлэлэрэ, дьарыктар саҕаланаллар, оттон оҕолор быһыыны ылар кыахтара суоҕун туһунан Ольга Балабкина санатта.
«Онон, кинилэр уонна хат дьахталлар доруобуйаларын тулалыыр дьоно эрэ харыстыыр кыахтаахтар», — диэн Ольга Балабкина бэлиэтээтэ.
Бүгүн Саха сиригэр «Спутник Лайт» вакцина 10500 дозата кэллэ. Ыарыы турбут кэмиттэн уопсайа 315555 вакцина дозата кэллэ, онтон 90,2%-нын туһаннылар. Вакцина бастакы дозатын 283613 киһи ылла.
