Вице-премьер Ольга Балабкина коронавирустан олохтоммут усулуобуйа туругун боппуруостарынан суруналыыстары кытта көрсүһүү кэмигэр изоляция эрэһиимин тутуһуу булгуччулааҕын санатта.
«Билигин саастаах дьон өрөспүүбүлүкэҕэ биллэриллибит хааччахтааһыны тутуспакка уулуссаҕа тахсаллара элбээтэ. Кинилэргэ аҕам саастаах дьоҥҥо бу ыарыы ордук кутталлааҕын туһунан санатыахха наада», — диэн Ольга Балабкина бэлиэтээтэ.
Саха сиригэр олохтоммут эпидемиологическэй турук оннунан хаалар. Бүгүн, муус устар 7 күнүгэр Дьокуускайга өссө биир ыарыһах толору эмтэнэн балыыһаттан таҕыста. Онон билиҥҥи туругунан сэттэ коронавирустаабыт киһи эмтэниини ааһар.
Маны тэҥэ, аэропорт үлэтин быстах кэмҥэ тохтотор туһунан боппуруос турбатын, бу өрөспүүбүлүкэни атын регионнары кытта ситимниир сүрүн утах буоларын тоһоҕолоото.
«Аэропортка хонтуруоллуур миэрэлэр толору ыытыллаллар», — диэн вице-премьер чопчулаата.
