Бэс ыйын 26-27 күннэригэр Өлүөхүмэ улууһун Ааннаах хочотугар ыытыллыбыт Олоҥхо ыһыаҕын «Саха» национальнай көрдөрөр-иһитиннэрэр хампаанньа үрдүк таһымнаахтык сырдатта.
«Өлүөхүмэҕэ Аанньаах хочотугар олус кыраһыабай сиргэ Олоҥхо ыһыаҕа үрдүк тэрээһиннээхтик ааста. Өлүөхүмэ дьоно-сэргэтэ бары ис сүрэхтэриттэн кыһалланнар бу ыһыах үчүгэйдик ааһарыгар бэйэлэрин кылааттарын киллэрдилэр диэн биһиги бэлиэтии көрдүбүт. Уонна биллэн турар, бу сылга өрөспүүбүлүкэҕэ бастакы улахан ыһыаҕы Саха сирэ барыта көрөрүн туһугар, 20 киһилээх делегациянан кэлэн үлэлээтибит. Ол курдук радиоҕа, икки телеканалга, туох баар социальнай ситимнэрбитигэр бу ыһыаҕы толору көрдөрдүбүт. Олоҥхо ыһыаҕын аһыллыытын олус элбэх киһи көрөн икки ыйдаах телевизорынан көрүүгэ рекорд олохтооммута дьон-сэргэ ыһыаҕы ахтыбытын уонна суохтаабытын бэлиэтиир. Сотору кэминэн Горнайга ыытыллыахтаах Манчаарыны оонньууларын эмиэ күүскэ сырдатарга бэлэммит», — диэн хампаанньа генеральнай дириэктэрэ Олег Марков бэлиэтээтэ.
Саха сирин олохтоохторо Олоҥхо ыһыаҕын тэрээһиннэрин икки күн устата НВК«Саха» уонна «Якутия24» ханаалларга, хампаанньа ютубка ханаалыгар уонна социальнай ситимнэригэр быһа эфиргэ көрдүлэр уонна «Тэтим» араадьыйа долгуннарыгар иһиттилэр.
