Орто Халыма куоракка Халыма өрүс уутун таһыма критическэй бэлиэни куоһарда.
Орто Халыма улуустааҕы дьаһалтата иһитиннэрэринэн, ыам ыйын 20 күнүн 18.00 чаастааҕы туругунан Халыма өрүс уутун таһыма 1201 сантиметрга тэҥнэһэр, критическэй таһым — 1200 сантиметр.
Билиҥҥи туругунан олохтоох аэропорт көтөр-түһэр балаһатын уу ылла. Халаан уута ылбыт сирдэрин быһаарыы ыытыллар, олорор дьиэлэри уу ылыыта бэлиэтэммэт.
«Воинскай» быһыты бөҕөргөтүү үлэтэ саҕаланна. «Кулума» култуура киинигэр бастакы быстах кэмҥэ олохтуур пуун бэлэм. Улууска ЫБММ суһал бөлөҕө үлэлиир. Исписэлиистэр харыы үөскүөн сөптөөх сирдэринэн өрүс мууһун дэлби тэптэрии үлэлэрин ыыталлар.
Улуус баһылыгын солбуйааччы Анна Попова бэлиэтииринэн, уопсайа үс быстах кэмҥэ олохтуур пуун тэриллибит. Ас-үөл, эмп-том, бастакы ирдэнэр табаардар саппаастара хаҥатыллыбыт.
