Орто Халымаҕа «Колымское подворье» диэн саҥа уопсастыбаннай сири арыйдылар. Бу туһунан «LETO» куорат компетенциятын киинэ иһитиннэрэр. Манна араас тэрээһиннэри ыытыахха сөп. Оҕо былаһаакката, сыана, амфитеатр, парковка, арт-эбийиэктэр, спортивнай былаһаакка киирдэ. Бырайыагын «База 14» архитектурнай бюро оҥорбут. Бары өттүнэн уот-күөс турбут, 3000 квадратнай миэтэрэ плитка тэлгэммит.
«Бырайыак Орто Халыма уратытын көрдөрөр, куорат ортотугар баар, онон тула өттө барыта суолталаах тэрилтэлэр — култуура дьиэтэ, кыраайы үөрэтэр музей, А.Н. Созонов аатынан оҕо искусствотын оскуолата, Покровскай таҥара дьиэтэ», — диэн иһитиннэриигэ этиллэр.
2020 сыллаахха Орто Халыма дьаһалтата Куорат табыгастаах эйгэтин тэрийии бүтүн россиятааҕы куонкуруска кыттыбыта. 50 мөлүйүөн солкуобай федеральнай өйөбүлү ылбыта.
Кэлиҥҥи икки сыл устата судаарыстыбаннай бырагыраамаларынан отучча уопсастыбаннай сир оҥоһулунна. Быйыл Верхоянскай уонна Среднеколымскай куораттарга сабыс-саҥа уопсастыбаннай сирдэргэ Саҥа дьыллааҕы харыйа уоттара сандаара тыктылар.
