Саха сирин олох-дьаһах коммунальнай хаһаайыстыбатын Орто Халыматааҕы салаатын ититиини хааччыйар эбийиэктэрэ атырдьах ыйын 25 күнүттэн үлэлэрин саҕалаатылар. Бу туһунан тэрилтэ пресс-сулууспата иһитиннэрэр.
«Билигин бары хочуолунайдар социальнай эбийиэктэргэ уонна олорор дьиэлэргэ штатнай эрэһииминэн ититиини биэрэ тураллар», – диэн этиллэр.
Улуустааҕы салаа тоҕус нэһилиэккэ уонна Орто Халыма куоракка түөрт уунан хааччыйар эбийиэги уонна 14 хочуолунайы үлэлэтэр. Ититии ситимин уопсай уһуна 67,5 килэмиэтиргэ тэҥнэһэр, уу ситимэ — 2,5 килэмиэтиргэ.
Күһүҥҥү-кыһыҥҥы оттук кэмин хааччыйарга Орто Халымаҕа былааннаммыт 37 400 туонна оттук саппааһа толору тиэрдиллибитэ этиллэр: 36,3 тыһыынча туонна таас чох уонна 1,1 тыһыынча туонна ньиэп бородуукталара.
Кыһыҥҥы оттукка бэлэмнэнии өрөмүөнүн кэмигэр улуустааҕы салаа үлэһиттэрэ ууну хачайдыыр оборудованиены уларыттылар уонна 5,5 килэмиэтир усталаах инженернэй ситимнэри саҥартылар.
