Москваҕа, «Россия» Национальнай киин былаһааккатыгар, «Москваҕа Уһук Илин регионнарын күннэрэ» бырайыак чэрчитинэн оскуола оҕолорун форумнарыгар В.К.Арсеньев аатынан «Уһук Илин» бүтүн россиятааҕы литературнай бириэмийэни билиһиннэрдилэр. Бырайыак «Фонд развития социальных инициатив» коммерческайа суох тэрилтэтин, Уһук Илин уонна Арктика сайдыыларын корпорациятын, Россия Илинин сайдыытын министиэристибэтин, Уһук Илиҥҥи уокурукка РФ бэрэсидьиэнин боломуочуйалаах бэрэстэбиитэлин аппаратын өйөбүллэринэн олоххо киирэр.
Бириэмийэ куратора Роман Косыгин эдэр ааптардарга сүбэ-ама биэрдэ. Ааптардар Уһук Илин туһунан кинигэни суруйар баҕа санаалаахтар.
«Ааптар ханна олороро туох да оруолу оонньообот – Арсеньев аатынан бириэмийэҕэ Уһук Илиҥҥэ олорбот дьон айымньылара кэлэллэр. Ол кэриэтэ ааптар олоҕу олорбут уопуттаах, интэриэһинэй түбэлтэлэри, кэпсээннэри билэр буолуохтаах уонна, биллэн турар, айымньытын нуучча тылынан үчүгэйдик суруойуохтаах», – диэн бириэмийэ куратора эттэ.
«Молодость» шеф-эрэдээктэрэ уонна бириэмийэ дьүүллүүр сүбэтин чилиэнэ Антон Мамон бэлиэтииринэн, Уһук Илин дьиҥ-чахчытык киһини соһутуон сөптөөх сир буолар.
«Оҕолор Уһук Илини кытта литература көмөтүнэн билсэр кыахтаахтар. Мин аан бастаан Уһук Илиҥҥэ тиийэн баран өйүм-санаам барыта уларыйбыта. Дойдубут быраҕыллыбыт, ханна эрэ муннукка сытар сирэ буолбатах этэ. Владивосток курдук улахан, икки цивилизация олорор мегаполиһын көрбүтүм. Туризм киэҥник сайдыбыт, култуура, үп-харчы, идеология эйгэтигэр атастаһыы бара турар», — диэн кини бэлиэтээтэ.
Арсеньев аатынан бириэмийэ куонкуруһугар бэчээттэммит да, электронно да тахсыбыт айымньылары туталлар.
В.К. Арсеньев аатынан «Уһук Илин» бүтүн россиятааҕы литературнай бириэмийэ сэттис сезонун түмүгэ биллэрэ ыйтан кыра хаалла. Кыайыылаахтары үгэс быһыытынан ахсынньыга Москваҕа, Россиятааҕы култуура пуондатын былаһааккатыгар буолуоҕа. Хас биирдии анал аакка («Длинная проза», «Короткая проза», «Проза для детей») үстүү айымньы киириэҕэ. Бу туһунан «Россия сегодня» медиабөлөх норуоттар икки ардыларынааҕы мультимедийнай пресс-киинигэр алтынньы 20 күнүгэр иһитиннэрбиттэрэ.
Хаартыска: sakha.gov.ru
