СӨ Ыччат бэлиитикэтин миниистирэ, СВО кыттыылааҕа Петр Шамаев Сунтаар улууһугар үлэлиир «Харысхал» волонтерскай бөлөҕүн кытта көрүстэ. Кини бу көрсүһүүгэ ил-эйэ туругурарын туһугар бэйэлэрин сылаастарын, ийэлии иэйиилэрин иҥэрэн үлэлии сылдьар дьоҥҥо махталын биллэрдэ.
Дойду көмүскэлигэр хорсуннук сылдьыбыт байыаһы волонтердар олус истиҥник, алгыстаах тылларынан көрсүстүлэр. Бу дьиҥнээх сомоҕолоһуу, саха дьоно байыастарын туһугар кыһамньыларын биир туоһута буолар.
«Харысхал» бөлөх ыйан-кэрдэн биэрээччитэ Жанна Макарова волонтердар бүгүҥҥү үлэлэрин кэпсээтэ. Манна түмүллэн олорор ыал ийэлэрэ, эбэлэрэ уонна эдьиийдэрэ бэйэлэрин баҕа өттүнэн, күн-түүн диэбэккэ, байыастарга аналлаах сылаас таҥаһы тигэллэр, хаххалыыр сиэккэни өрөллөр.
Петр Шамаев бэйэтин этиитигэр: «Эһиги илиигит итиитин иҥэрбит малларгыт, сиэккэлэргит биһигини харыстыыр, санаабытын күүһүрдэр. Бу — норуот күүһэ, бу — биһиги дьоллоох кэскилбит туһугар оҥоһуллар сүдү үлэ», — диэн бэлиэтээтэ.
Бу көрсүһүү — фронт уонна тыыл ситимин бөҕөргөтүүгэ, байыастар уонна волонтердар икки ардыларыгар ыкса ситими олохтуурга улахан суолталаах хардыы буолар. «Харысхал» волонтердара инникитин даҕаны байыастарга көмө-өйөбүл буола туруохтара.
