Бүгүн, кулун тутар 3 күнүгэр, ХИФУ устудьуоннарын көҕүлээһиннэрин киинигэр 9–11 кылаас үөрэнээччилэригэр «Почувствуй себя полиглотом!» диэн өрөспүүбүлүкэтээҕи куонкурус ыытылынна.
Тэрээһини ХИФУ Тас дойду филологиятын уонна регионоведениетын института (ИЗФиР) тэрийдэ.
Куонкуруска элбэх оскуола үөрэнээччилэрэ кыттыыны ыллылар: Батамайдааҕы сүрүн оскуола, Намнааҕы орто оскуола, ХИФУ анал үөрэх-билим киинэ, 31 №-дээх орто оскуола, 6 №-дээх орто оскуола, 8 №-дээх куораттааҕы классическай гимназия, Алтаннааҕы орто оскуола, 29 №-дээх орто оскуола, 1 №-дээх орто оскуола, 38 №-дээх орто оскуола, 33 №-дээх орто оскуола.
АПО-21 бөлөх устудьуоннара Фёдорова Аида уонна Нестерова Снежана «Китайский за 5 минут!» ыстаансыйа тэрийээччилэрэ буоллулар. Манна «Чохоон» интернет-ханаал «Кытай тыла» диэн видеоуруоктарын тутуннулар. Оскуола оҕолоро бу видеоуруоктар көмөлөрүнэн Илин уонна Арҕаа дойдулар тылларын үөрэттилэр. Оҕолор сорудахтары үөрэ-көтө толордулар, иероглифтары бэрт түргэнник үөрэттилэр уонна Кытай тылынан саҥаран көрдүлэр.
Бу маннык тэрээһиннэр Кытай тылын үөрэтэргэ интэриэһи тардаллар, кыттыылаахтар билиилэрин-көрүүлэрин хаҥаталлар, интерактив быһыытынан билиини быраактыкаҕа туһанарга көмөлөһөллөр.
Санатарбыт курдук, «Чохоон» ханаалга «Кытай тыла» видеоуруоктары Тас дойду филологиятын уонна регионоведениетын институтун устудьуоннара «Саха» НКИХ «Чохоон» интернет-ханаалын кытта оҥороллор.
