Саха сирин олохтооторугар «Поговорим культурно» Алексей Елисеевич Кулаковскай — Өксөкүлээх Өлөксөйгө анаммыт биэрии видеотын сүрэхтээтилэр.
Бырайыак улуу киһи, духуобунай лидер, саха литературатын төрүттээччи, фольклорист уонна уопсастыбаннай диэйэтэл айар үлэтин уонна олоҕун чинчийиитэ буолар.
Передача экспертэрин быыстарыгар М.К. Аммосов аатынан ХИФУ бэрэсидьиэнэ Евгений Михайлов, СӨ судаарыстыбаннай сүбэһитэ Андрей Борисов, РФ судаарыстыбаннай думатын дьокутаата Сардана Авксентьева, Дьокуускай куорат мээрэ Евгений Григорьев, киинэ режиссера Дмитрий Давыдов, скульптор Николай Чоччасов, суруйааччы Максим Эверстов уо.д.а. биллэр-көстөр дьон кэлбиттэр. Кинилэр култуура нэһилиэстибэтин, Алексей Кулаковскай Саха сирин историятыгар дьайыытын туһунан санааларын эппиттэр.
Ордук болҕомтону биэриигэ «Саха интеллигенцията» сурукка уурбуттар, онно Өксөкүлээх Өлөксөй төрүт кыраай инникитин, кыһалҕаларын биттэммит. Сүрүн идеята — «норуоту харыстааһын». Билиҥҥи кэмҥэ сурук саха норуотун култууратын нэһилиэстибэтин историческай пааматынньыга буолар. Устууга Дьокуускайдааҕы национальнай гимназия үөрэнээччилэрэ, АГИКИ уонна Дьокуускайдааҕы култуура уонна искусство кэллиэһин устудьуоннара кыттыбыттар.
Бырайыак салайааччыта Яна Угарова, сценарий ааптара уонна режиссер Аполлинария Дегтярева бэлиэтээбиттэринэн, биэриини оҥорорго СӨ бастакы бэрэсидьиэнэ Михаил Ефимович Николаев эппит идеятыттан толкуйдаабыттар. Кини хас биирдии норуокка бэлиэ буолбут дьон баарын, холобур индустарга Махатма Ганди, казахтарга Абай, оттон биһиэхэ Алексей Елисеевич Кулаковскай буоларын эппит.
Премьераны Өрөспүүбүлүкэ күнүгэр киэҥ уопсастыбаннас кыттыытынан тэрийбиттэр. Режиссер, сценарий ааптара Аполлинария Дегтярева эппитинэн, видео бырайыак киэҥ аудиторияҕа туһууланар, ол эрээри, Кулаковскай тыыппыт тиэмэлэрин эдэр ыччат эмиэ толкуйдуон баҕарар.
«Поговорим культурно» бырайыак РФ култуураны көҕүлээһиҥҥэ бэрэсидьиэн пуондатын өйөбүлүнэн оҥоһуллубут. Биэрии иккис, үһүс чаастара ыам ыйын саҕатыгар көстөллөрө былааннанар.
