Покровскай куорат баһылыга Петр Гермогенов салайааччылаах, Александр Рожин, Андрей Дьяконов, Прокопий Севостьянов, Дмитрий Бурцев састааптаах делегация Мэҥэ Хаҥалас улууһун Майаҕа сэлиэнньэтигэр үлэлээтилэр.
Оробуочай бөлөҕү Майа сэлиэнньэтин баһылыга Алексей Неустроев, баһылык солбуйааччыта Вячеслав Санников уонна дьаһалта эппиэттээх үлэһиттэрэ көрүстүлэр. Майа сэлиэнньэтин тупсаҕай тутууларын, дьон-сэргэ сынньанар сирдэрин көрдүлэр. Анал байыаннай дьайыыга сылдьар дьонноругар көмөлөһөр иистэнньэҥнэри, сиэккэ оҥорор эбээлэри кытта көрсөн кэпсэттилэр. Саха балаҕаныгар алгысчыт, үтүө, сырдык санаалаах Зиновий Игнатьевтан алгыс ыллылар, арчыланнылар, туруктарын бөҕөргөттүлэр.
Быйыл Майаҕа Чөл олох сыла. Бу хайысхаҕа элбэх үлэни ыыталлар. Биир саамай улахан соруктара хаалбыт 5 арыгы маҕаһыын үлэтин тохтоппуттар. Майа эр дьоно үлэни өрө туталларын, 100-нэн киһи субуотунньукка кытталларынан, олорор сирдэрин кыһалҕаларын быһаараллар. Эр дьон түмсүүтэ Майа сэлиэнньэтин сайдыытын түстүүрүн өрө көтөҕүллэн туран кэпсээтилэр. Кинилэр уопсастыбаннай үлэҕэ көхтөөхтөрүнэн Бүтүн өрөспүүбүлүкэҕэ киэҥник биллэллэр.
Түмүккэ элбэх саҥа санаалары, сүбэлэри, идиэйэлэри, этиилэри иһиттибит. Инники былааммытын торумнаан, санаабыт күүһүрэн кэллибит.
