Бүгүн «Азия оҕолоро» оонньууларга тхэквондо көрүҥэр кыргыттарга 63 киилэттэн үөһэ ыйааһыҥҥа Полина Михальчук бастаан Беларусь хамаандатыгар бастакы кыһыл көмүс мэтээли аҕалла.
«Күрэхтэһии олус үчүгэй. Аан бастакытын маннык үрдүк таһымнаах спортивнай тэрээһиҥҥэ кыттабын. Спортсменнар бары таһымнара атын-атын буолан, кинилэр хайдах кытталларын көрөр олус интэриэһинэй. Мин бастааммын хамаандабар маҥнайгы кыһыл көмүс мэтээли аҕаллым. Финалга киирбит биир дойдулаахтарбар күүскэ ыалдьыбытым. Иккис-үһүс миэстэ буоллулар, ол эрээри кинилэр бары маладьыастар. Хамаанда бүттүүн биһигиннэн киэн туттуоҕа диэн эрэнэбин. Онон «Азия оҕолоро» – норуоттар доҕордоһуулара, бары бэйэ-бэйэбитин кытары билсэбит, кэпсэтэбит», — диэн Полина үөрэ-көтө кэпсиир.
