Бүгүн, олунньу 24 күнүгэр, Дьокуускайга Улуу Кыайыы 80 сылыгар, Россияҕа Аҕа дойдуну көмүскээччи, Саха сиригэр Ийэ дойдуну көмүскээччи сылларыгар анаммыт «Сила в единстве!» диэн патриотическай аахсыйа үлэтин саҕалаата.
Тэрийээччилэр этэллэринэн, норуодунай аахсыйа култуурунай тэрээһин буоларын таһынан хоровой толорууну киэҥ эйгэҕэ таһаарар, дойдуга бэриниилээх буолууну бөҕөргөтөр, өрөспүүбүлүкэ олохтооҕун сомоҕолуур.
«Аахсыйа араас саастаах, идэлээх, интэриэстээх дьону түмэр. Кэллэктииптэр ортолоругар «Боевые шелкопряды Якутии» хор уопсастыбаннай хамсааһына баар. Хамсааһын кыттыылаахтара байыастары быыһыыр хаххалыыр сиэккэлэри өрөллөр. Кэнсиэртэн хомуллубут үп-харчы барыта Саха сириттэн СВО-ҕа сулууспалыы сылдьар уолаттарга ыытыллыаҕа», – диэн «Айар Кут» айар тэриллии салайааччыта Егор Иванов-Түмэрчиҥ эттэ.
Аахсыйа чэрчитинэн бүгүн «Россия — Моя история» диэн историческай пааркаҕа үөрэтэр уонна практическай маастар-кылаастар буолуохтара.
Олунньу 25 күнүгэр Дьокуускай куоракка «Триумф» спорт киинигэр Бүтүн Россиятааҕы хоровой куонкурус-бэстибээл регионнааҕы түһүмэҕин гала-кэнсиэрэ ыытыллыаҕа.
