Кулун тутар 18 күнүгэр «Профессионалы» Бүтүн Россиятааҕы чемпионат региональнай түһүмэҕин кыайыылаахтарын чиэстээһин тэрээһинэ Сунтаардааҕы политехническэй лиссиэй-интэринээт «Ай-сатаа» технопаркатыгар ыытылынна. Тэрээһин саҕаланыытыгар В.Г.Павлов аатынан Сунтаар алын сүһүөх оскуолатын 4-с кылааһын үөрэнээччитэ Толя Данилов ырыа ыллаан үөрэнээччилэри, педагогтары эҕэрдэлээтэ.
Сунтаар улууһун үөрэҕириитин управлениетын начальнига Борис Васильев «Профессионалы» Бүтүн Россиятааҕы чемпионат региональнай түһүмэҕэр улуус үөрэнээччилэрэ ситиһиилээхтик кыттыбыттарын бэлиэтээтэ. Сэттэ оҕолор бириистээх миэстэлэри ылбыттара. Тойбохой орто оскуолатын 9-с кылааһын үөрэнээччитэ Саша Семенов «Изготовление чорона» компетенцияҕа кыайыылаах буолбута. Салайааччыта-Анатолий Семенов, Тойбохой орто оскуолатын педагога. Иккис миэстэлэри: «Архитектура» компетенциятыгар Сунтаардааҕы гимназия 10-с кылааһын үөрэнээччитэ Уруйдаана Назарова, салайааччыта Анна Иванова, технология учуутала; «Изготовление из конского волоса» компетенцияҕа Сунтаардааҕы политехническэй лиссиэй-интэринээт 10 кылааһын үөрэнээччитэ Кира Иванова, салайааччыта-Анна Попова, эбии үөрэхтээһин педагога; «Ювелирное дело» компетенцияҕа Сунтаар №1 орто оскуолатын 10-с кылааһын үөрэнээччитэ Ваня Николаев, салайааччыта-Василий Уаров, Сунтаардааҕы оҕо искусствотын оскуолатын эбии үөрэхтээһин педагога ылбыттара. Үһүс миэстэ — «Правоохранительная деятельность» компетенциятыгар Сунтаар №1 орто оскуолатын 10-с кылааһын үөрэнээччитэ Мичил Осипов, салайааччыта Владимир Спиридонов, ОБЗР учуутала; «Поварское дело» компетенцияҕа Сунтаар №1 орто оскуолатын 9-с кылааһын үөрэнээччитэ Азалия Васильева, салайааччыта Наталия Андросова, технология учуутала; «Столярное дело» компетенцияҕа Эрик Григорьев, Сунтаар №1 орто оскуолатын 9 кылааһын үөрэнээччитэ, салайааччыта Гаврил Антонов, технология учуутала буолбуттара.
Начальник Борис Васильев үөрэнээччилэри уонна педагогтары үрдүк ситиһиилэринэн эҕэрдэлээн туран өйдөбүнньүк бэлэхтэри, махтал суруктары туттарда. Төгүрүк остуол тула истиҥ кэпсэтии, санаа атастаһыыта ыытылынна.
«Профессионалы» чемпионатка интэриэс улаатан, оҕолор сатабыллара уонна дьоҕурдара сайдан, идэҕэ үөрэтиигэ, бэлэмнээһиҥҥэ үлэ кэҥээн иһэр. Чемпионат оҕо оскуола сааһыттан билэрэ-көрөрө үксүүрүгэр, сатабылы иҥэринэн, кыаҕын арыйан, салгыы сайдарыгар көмөлөһөр. Быйыл региональнай түһүмэххэ Сунтаар улууһун хамаандата ситиһиилээхтик кыттыбытыгар педагогтар оруоллара улахан. Кинилэр айымньылаах үлэлэрин түмүгэ-оҕо ылбыт билиитэ, сайыннарбыт сатабыллара инникитин идэтин сөпкө таларыгар, олоҕор суолун-ииһин буларыгар сүрүн тирэх буолаллар.
Хаартыска: оскуола пресс-сулууспата
