Россия бэрэсидьиэнэ Владимир Путин ойуур баһаарын умуруорууга кутталы туоратар-быыһыыр үлэни тэрийиилэрин иһин Саха сирин биэс олохтооҕун наҕараадалаата.
Туһааннаах ыйаах правовой акталар официальнай сайтыгар таҕыста.
Ол курдук, «өрөспүүбүлүкэҕэ ойуур баһаарын умуруорууга кутталы туоратар-быыһыыр үлэни саталлаахтык тэрийии иһин» Россия бэрэсидьиэнин бочуотунай грамотатынан Сунтаар улууһун баһылыгын бастакы солбуйааччыта Николай Александров; Саха сирин волонтердарын кытта үлэлиир киин дириэктэри солбуйааччыта Айыллаана Винокурова; Полиция юридическй колледжын Саха сиринээҕи салаатын устудьуона Алексей Леонтьев уонна Таатта нэһилиэгин баһылыга Егор Павлов наҕараадаланнылар.
Ону тэҥэ, наҕараадаламмыт дьон испииһэгэр СӨ бырабыыталыстыбатын бэрэссэдээтэлин бастакы солбуйааччыта Дмитрий Садовников баар.
Санатан эттэххэ, Россия бэрэсидьиэнэ Владимир Путин дойду куораттарыгар ойуур баһаарын уонна халаан уутун содулун туоратыыга үлэлээбиттэри наҕараадалаабыта, олор истэригэр Саха сириттэн 11 киһи бэлиэтэммитэ.
