Сэтинньи 26 күнүгэр Ил Түмэн пленарнай мунньаҕар Саха Өрөспүүбүлүкэтин 2026 сыллааҕы судаарыстыбаннай бүддьүөтүн уонна 2027-2028 сыллардааҕы былааннаммыт бүддьүөтүн ылыннылар.
Сокуон барылыгар 700-тэн тахса уларытыы эрдэ сөбүлэһии хамыыһыйатын мунньахтарыгар көрүллүбүтэ. Уопсайа 28 млрд солкуобай суумалаах федеральнай бүддьүөт эбии дохуотун үллэриигэ, ону тэҥэ норуодунай депутаттар киллэрбит 270-ча көннөрүүлэригэр ураты болҕомто уурулунна.
Ил Түмэн бүддьүөккэ, үпкэ, сыана бэлиитикэтигэр итиэннэ бас билии уонна приватизация боппуруостарыгар сис кэмитиэтин бэрэссэдээтэлэ Юрий Николаев бу сиэссийэҕэ кэпсэтии түмүгүнэн сүрүн хайысхалар бигэргэтиллибиттэрин билиһиннэрдэ.
Судаарыстыба бүддьүөтүн былааннаммыт уопсай дохуота 2026 сылга 337 036 268,1 тыһ. солкуобайга тэҥнэһиэҕэ, ол иһигэр 117 414 732,1 солк – төннөрүллүбэт үп, манна РФ бүддьүөт систиэмэтин атын бүддьүөттэриттэн киирбит бүддьүөттэр икки ардыларынааҕы трансферттар – 111 031 749,2 солк. Ороскуот – 349 788 248,0 тыһ. солк. Бүддьүөт дефицитэ − 12 751 979,9 тыһ.
Ил Дархан Айсен Николаев СӨ бүддьүөтүн социальнай хайысхата оннунан хаалар диэн бэлиэтээтэ. Ороскуот аҥара доруобуйа харыстабылыгар, үөрэхтээһиҥҥэ уонна социальнай көмүскэлгэ ананар. Кини федеральнай бүддьүөттэн өрөспүүбүлүкэҕэ эбии 28 млрд солк киирбитэ сүрүн хайысхалары бөҕөргөтөргө уонна кэлэр сылга бүддьүөт туруктаах буолуутун хааччыйарга төһүү күүс буоларын тоһоҕолоото.
Ил Түмэн миниистирдэргэ сөбүлэһии хамыыһыйатын мунньахтарыгар ырытыллыбыт сүрүн боппуруостарга сүбэлэри биэрэр уураах ылынна. Ол иһигэр коммунальнай комплекс тэрилтэлэригэр субсидиялар (ОКК), социальнай төлөбүрдэр, хотугу таһаҕаһы тиэйии, хамнас индексацията уонна да атын хайысхалар.
