Саха сирин Ил Дархана Айсен Николаев «Прямой разговор» биэрии хаамыытыгар региоҥҥа коронавирус утары маасканы булгуччу кэтэри ирдиир миэрэни киллэрэр былаан суоҕун туһунан иһитиннэрдэ.
«Дьокуускай куоракка коронавирус ыарыыта үрдүк таһымҥа тахсан эрэр. Бу көрдөрүү сотору намтыаҕа. Оройуоннарга олохтоохтор саҥа ыалдьан эрэллэр. Билигин биһиги „омикрон“ штамнаах вирус саҥа көрүҥүн кытта утарылаһабыт. Ыалдьыбыт дьоҥҥо үксүлэригэр ыарыы чэпчэкитик бэриллибит буоллаҕына, билигин маасканы кэтии эрэһиимин киллэрэр наадата суох», — диэтэ Айсен Николаев.
Ол эрээри хайа баҕарар тэрилтэ бэйэтин эбийиэгин иһигэр маасканы кэтии эрэһиимин киллэриэн сөп.
Саха сиригэр ааспыт сууккаҕа эбии 487 киһи коронавирустаабыт, Дьокуускайга — 359 түбэлтэ бэлиэтэнэр.
