Бэс ыйын 10 күнүгэр Саха сиригэр ойуур баһаардарын 13 көтөр аалынан кэтээн көрдүлэр.
Бу туһунан СӨ Экологияҕа, айылҕа туһаныытыгар уонна ойуур хаһаайыстыбатыгар миниистирин солбуйааччы Андрей Коноплев иһитиннэрдэ.
Бүгүҥҥү сарсыардааҥҥы туругунан, өрөспүүбүлүкэ сиригэр-уотугар уопсайа 564 гектар иэннээх 7 ойуур баһаара умайа турар, ол иһиттэн иккитэ бохсулунна.
Көтөр ааллар Амма, Үөһээ Дьааҥы, Үөһээ Бүлүү, Горнай, Ленскэй, Мииринэй, Мэҥэ Хаҥалас, Ньурба, Өлүөхүмэ, Сунтаар, Хаҥалас, Кэбээйи, Таатта, Чурапчы, Томпо, Уус Маайа уонна Уус-Алдан улуустарыгар, ону кытта Дьокуускай куорат уонна киин улуустар сирдэрин кэтииллэр.
