Дойдуга Дьиэ кэргэн, өрөспүүбүлүкэҕэ Оҕо сылыгар анаммыт «Экология дьиэ кэргэнтэн саҕаланар» диэн куонкуруска Саха сирин олохтоохторо кыттыыны ылыахтарын сөп. Куонкуруска кыттааччылар өрөспүүбүлүкэ экоактыбыыстара айылҕаҕа туһалаах дьарыктарын кытта билсэр, саҥа доҕоттору булар, уопут атастаһар кыахтаналлар.
Сайаапкалары сэтинньи 1 күнүгэр диэри туталлар.
Ол курдук, куонкурус анал ааттарын кытта билиһиннэрэбит:
☘ Экосемья – дьиэ кэргэн оҕону айылҕаны харыстыыр гына иитэргэ туттар ньымалара, дьиэ кэргэҥҥэ олохтоммут уонна саҥа экологическай үгэстэри өйөбүл, олорор дьиэни-уоту, хаһаайыстыбаны экологическай өттүттэн тупсарыы: бөҕү тус-туспа хомуйан быраҕыы, уоту-күөһү, ууну харыстааһын, үүнээйини олордуу, элбэх бөҕү таһаарбат сыалтан өйдөөн-төйдөөн таҥаһы-сабы, малы-салы туттуу уо.д.а.
☘ Эковолонтерство – дьиэ кэргэн экологическай бырайыактарга, аахсыйаларга, субуотунньуктарга, сири-уоту саҥардытар, чөлгө туһэрэр тэрээһиннэргэ, ойууру олордооһуҥҥа кыттыыны ылара киирсэр.
☘ Эконаставник – дьиэ кэргэн актыбыыһын уопута, үүнэр көлүөнэни айылҕаны, тулалыыр эйгэни харыстыыр үлэҕэ тардар дьоҕура, бу иһигэр билим-чинчийии үлэтэ эмиэ киирсэр. Кини экологическай тэрээһиннэри ыытар, оҕолорун, сиэттэрин тулалыыр эйгэни чинчийиигэ үөрэтэр, такайар.
☘ Экобизнес – дьиэ кэргэнинэн тулалыыр эйгэҕэ туһаны оҥорор урбаанньыттааһын. Ол курдук, экотабаардары оҥорон атыылааһын, сынньалаҥы тэрийээһин, тигээйини иитии, оту-маһы хомуйуу, турбаазалар, экотуризм уо.д.а.
☘ Экожурналистика – дьиэ кэргэн суруналыыстыката. Дьиэ кэргэнинэн экология боппуруостарын, кыһалҕаларын сырдатыы, дьиэ кэргэн стенгазетатын оҥоруу, экологическай остуоруйалары, сурунааллары, репортажтары, блогтары суруйуу, оҥоруу, ыытыы.
Сиһилии куонкурус туһунан балаһыанньаҕа киирэн бу сигэнэн ааҕыҥ.
