Өрөспүүбүлүкэтээҕи харах балыыһатын исписэлиистэрэ Нерюнгритааҕы киин балыыһаҕа 58 эпэрэссийэни ыыттылар. Бу туһунан балыыһа пресс-сулууспата иһитиннэрэр.
Биригээдэ састаабыгар икки офтальмохирург — Максим Дьячковскай уонна Мария Степанова, анестезиолог Сергей Цыганков, икки медицинскэй сиэстэрэ — Елена Ермолаева уонна Анна Колодезникова миэстэтигэр тиийэн үлэлээтилэр.
«Өрөспүүбүлүкэтээҕи харах балыыһатын исписэлиистэрэ Нерюнгри оройуонугар улахан дьон уонна оҕо поликлиникаларыгар куруутун сылдьаллар. Бииргэ үлэлээһин түмүгүнэн, Нерюнгрига сыллата 60-ча катаракта утары эпэрээссийэ ыытыллар. Бу, медицинскэй өҥө тоҕоостоох буоларын үрдэтиигэ төһүү күүс буолар», — диэн Нерюнгритааҕы киин балыыһа сүрүн бырааһа Алексей Яворскай кэпсээтэ.
Ыытыллыбыт эпэрээссийэлэр бары этэҥҥэ ааспыттара бэлиэтэнэр. Бары ыарыһахтар 60 саастарын ааспыт дьон, саамай кырдьаҕастара 92 саастааҕа этиллэр.
