Өрөспүүбүлүкэ Үрдүкү суута Дьокуускай аэропордугар урут дириэктэрдии сылдьыбыт Николай Местников бэрик ылыы дьыалатынан ааһыныы түһэрбитин ылыммата.
Николай Местников суукка бүтэһик тылыгар үлэлиирин тухары 25 мөлүйүөн солкуобайы үтүө дьыалаҕа ыыппытын туһунан этэ сатаабыт.
«Аэропорду салайар кэммэр дьоҥҥо көмөлөһөн, 18 мөлүйүөн солкуобайы, 4,5 мөлүйүөн солкуобайы — социальнай эбийиэктэр тутууларыгар, ону кытта куорат Гагаринскай уонна Строительнай уокуруктарыгар оҕо былаһааккаларын тутарга уонна 3 мөлүйүөнтэн тахсаны бөҕү тиэйэргэ уонна суол оҥоһуутугар ыыппытым», — диэтэ.
Сууттанааччы суут быһаарыытын көтүрэргэ уонна накаастабыл миэрэтин дьиэтээҕи хаайыыга уларытарга көрдөспүт.
Суут Местников бүтэһик тылын истэн баран, силиэстийэлиир изоляторга уонна холуонньаҕа сыппыт болдьоҕун учуоттаан туран, алтынньы 18 күнүттэн ааҕарга уларыппыт. Маныаха кытаанах режимнээх холуонньаҕа тоҕус сыл көҥүлүн быһарга диэн уопсай болдьоҕо уларыйбата.
Санатар буоллахха, Дьокуускай куораттааҕы суут Дьокуускай аэропордун урукку генеральнай дириэктэрин Николай Местниковы улахан бэриги ылыыга буруйдааҕынан аахпыта.
