Саха сирин үөрэнээччитэ Анастасия Татаринова «РискСат» оскуола бырайыактыыр бөлөҕүн састаабынан Саҥа Сир архипелаг аттыгар арыы арыйда. Бу туһунан өрөспүүбүлүкэ Москватааҕы бэрэстэбиитэлэ иһитиннэрдэ.
Атырдьах ыйын 20 күнүгэр хотугу муора флотун экспедициялыыр этэрээтэ Вилькицкай арыы хомотугар, арассыыйа оскуолатын оҕолоро спутник нөҥүө кэтиир технология көмөтүнэн арыйбыт арыылара баарын бигэргэттэ.
Россия сирэ 5,6 га иэннээх мууһунан бүрүллүбүт сиринэн кэҥээтэ — бу оскуола оҕолорун хамаандатын ситиһиитэ. Арыы Россия картатыгар киллэриллиэҕэ.
«Биһиги арыыны от ыйын 9 күнүгэр арыйбыппыт. Арыыны уонна мууһу силбиир муус баттык түһүүтүн, арыы тахсарын онлайн-эрэһииминэн кэтээбиппит. Билигин биһиги хотугу флот экспедициятын кытта салгыы чинчийэр сыаллаах, ыкса ситимнээхтик үлэлиибит. Бу миэхэ ураты уонна интэриэһинэй опыт буолар. Арыйыыбыт, быйыл 85 сааһын бэлиэтиэхтээх, Сэбиэскэй Сойуус Геройа, СССР лүөччүк-космонава Герман Степанович Титов кэриэһигэр ананна», — диэн кэпсээтэ Анастасия Татаринова.
Бүгүн Анастасияҕа Москваттан научнай арыйыытын иһин телемост нөҥүө наҕараада туттарыы тэрилиннэ. Видеоконференция кыттыылаахтара билии араас салааларыгар уонна география сайдыытыгар тус кылаатын иһин махтал сурук аахтылар, маны тэҥэ сыаналаах кинигэлэри бэлэхтээтилэр.
Анастасия бөлөҕөр Троицк, Тула, Дедовск, Венева, Санкт-Петербург, Гатчина куораттартан эдэр чинчийээччилэр бааллар. Анастасия Татаринова бэйэтэ Маҕан орто оскуолатын техническэй киинигэр дьарыктанар.
